尋日我親眼睇住三色回收箱被垃圾車一次收走之後，今日忍唔住打咗去環境保護署。
以下係我同佢既對話（簡化內容）
我：我見到有三色回收箱回收品當正常垃圾處理，可以係邊投訴？
環：請問你係咩地方見到？如果公共屋村的話可以去房屋署，街既係食環署，體育場地就康文署。
我：商廈呢？
環：商廈就要問返管理公司，私人屋苑就要搵業主立案法團喇。
我：咁你地提出左一個「家居廢物源頭分類獎勵計劃 」有乜野監管同投訴方法？
環：無。
我：唔該晒。
我再上網睇咗唔同新聞同資料，發現咗大廈放三色回收箱係可以申請資助，以每樓層計最高可以有1000蚊資助金額，而資助額唔夠30萬的話係完全無人會主動去核數。
換句話說，放置成本極低，仲有少少錢去津貼返垃圾收集成本。
點解唔真係做回收？原來政府回收商碧瑤每月90萬處理全港2800個回收箱（應該只係屬於食環管既），即係每個回收箱成本約320蚊。而對上一個回收商「安記」被傳媒揭發回收品當普通垃圾處理，較早前政府問卷訪問31間回收商，佢地都表示超過一半回收物資賣唔出，要當垃圾處理。
加上香港係無途徑去使用回收資源，回收商最多只可以處理物流、分揀、打包工序。無公司可以將打成粒狀嘅膠料重新變成原材料，就算有，香港都無大型膠料製造商去購買，更諷刺嘅事係，要出口回收物料有可能運費比材料回收錢更高。
我一向都係可回收就盡量回收，盡返自己責任，但原來現實係，你回收都只不過係一種自我感覺良好同埋心安理得。
我絕對唔係咩環保人士，我只係覺得盡返少少公民責任去回收，我亦相信有好多人都係咁做，所以老套地講句，源頭減廢，可免則免。
Search